Qeveria e Kosovës parasheh përdorimin e zgjidhjeve të bazuara në treg, në formë të ankandeve konkurruese, për të ofruar energji të re, të ripërtëritshme me çmime të përballueshme. Ajo planifikon ta zbatojë ankandin e parë solar në vitin 2023, i cili do të pasohet me ankande të rregullta për të dyja teknologjitë (erë dhe solare), për ta demonstruar përkushtimin tonë për agjendën e gjelbër dhe për t’i inkurajuar investimet e sektorit privat për të ndihmuar në zhvillimin e burimeve tona të energjisë së ripërtëritshme.
Përmes kësaj strategjie, Kosova po merr rol udhëheqës që do të rezultojë në një shërbim modern, të besueshëm dhe të përballueshëm të energjisë elektrike për qytetarët e saj: një shërbim që e promovon një agjendë kuptimplote ndaj ndryshimeve klimatike dhe që i mbron mjetet e jetesës, si pjesë e një evoluimi drejt një të ardhmeje energjetike të qëndrueshme.
Strategjia e re është hartuar për t’ia mundësuar sektorit energjetik të Kosovës që të shërbejë si mjet për zhvillimin ekonomik të vendit dhe rritjen e mundësive për biznes dhe punësim.
Kjo strategji është e rëndësishme sepse:
Qasja e strategjisë e balancon sigurinë energjetike dhe përballueshmërinë e furnizimit me energji elektrike për konsumatorët duke e siguruar përkushtimin afatgjatë të Kosovës për dekarbonizim.
Trajtimi i ndryshimeve klimatike është prioritet kryesor për Kosovën, si pjesë e përkushtimit të shtuar dhe forcuar të qeverisë për ndërtimin e qëndrueshmërisë klimatike.
Strategjia për Energji synon ta promovojë zgjerimin e burimeve të ripërtëritshme të energjisë, duke përfshirë konsumatorët, përmirësimet e efiçencës së energjisë, një përgjigje efektive nga ana e kërkesës dhe rritjen e bashkëpunimit ndërkombëtar për të ndihmuar në arritjen e një udhërrëfyesi për energji më të pastër dhe ekonomikisht të qëndrueshme.
Prioritet kryesor është tërheqja e investitorëve privatë dhe të siguruarit që konkurrenca e drejtë do t’ia mundësojë vendit që t’i përzgjedhë propozimet me kosto më efektive për gjeneruesit e energjisë së pastër dhe të ripërtëritshme për energjinë elektrike.
© 2024 RESKosovo.